Прарэктар па вучэбнай рабоце – гэта адна з самых адказных пасадаў ва ўніверсітэце. Прафесіянал, які яе займае, адказвае за сутнасць навучальнай установы – навучальны працэс. Новым прарэктарам па вучэбнай рабоце Полацкага дзяржаўнага ўніверсітэта імя Еўфрасінні Полацкай стала Кацярына Ігараўна Галяшова, кандыдат эканамічных навук, дацэнт кафедры эканомікі.
![К.І. Галяшова](/images/NEWS/2023/2023-08-29-galeshova/gal-1.webp)
К.І. Галяшова
Кацярына Ігараўна Галяшова пачала свой акадэмічны шлях у Полацкім універсітэце і скончыла яго з адзнакай. З'яўляючыся маладым спецыялістам, у 2016 годзе яна стала старшынёй Савета маладых навукоўцаў Полацкага дзяржаўнага ўніверсітэта.
У гэтым жа годзе Кацярына Ігараўна паспяхова абараніла дысертацыю на тэму «Рэалізацыя кадравай дзейнасці ў арганізацыях Рэспублікі Беларусь на падставе ацэнкі і кіравання кадравымі рызыкамі», прадстаўленую на суісканне вучонай ступені кандыдата эканамічных навук.
У 2017 годзе яна стала лаўрэатам Спецыяльнай прэміі Полацкага ўніверсітэта «Крыніца Ведаў» у намінацыі «Малады навуковец года».
З 2020 па 2023 гады Кацярына Ігараўна Галяшова займала пасаду дэкана факультэта камп'ютарных навук і электронікі. Кацярына Ігараўна з увагай ставіцца да навукова-даследчай дзейнасці студэнтаў. Як навуковы кіраўнік, яна матывуе студэнтаў на напісанне навуковых прац і падтрымлівае іх ідэі.
Віншуем Кацярыну Ігараўну з новым этапам у кар'еры і жадаем поспехаў у прафесійнай дзейнасці!